劉德華（中）在新片中飾演爆炸品處理課高級督察，穿起重70磅的防爆衣抵達炸彈現場。
劉德華擔任監製、主演及投資的電影《拆彈專家》，昨日在灣仔稅務大樓外拍攝一場拆彈戲份，導演邱禮濤、演員吳卓羲（Ron）、姜皓文、蔡瀚億（BabyJohn）及張繼聰等亦有現身。
戲中飾演爆炸品處理課高級督察的華仔，在高溫天氣下，穿上一件重70磅的防爆衣，走向一個與波士頓馬拉松爆炸案中相同款式的土製炸彈，炸彈由壓力煲製成，華仔小心翼翼將炸彈放置入袋中。拍攝現場亦有安排真正的警方爆炸品處理課人員作現場指導，並有一輛仿製拆彈車及大量仿警車、消防車、警員等，如臨大敵。
華仔說：「導演偏向爆炸戲都喺現場拍攝，約三分之一屬後期製作。所以拍之前都有上堂，學習有關炸彈知識。」他透露戲中會與宋佳有感情瓜葛，並會有多場爆炸戲，其中一場會在香港貨櫃碼頭搭建紅隧場景，問到是否拍攝紅隧大爆炸？華仔說：「暫時炸唔到。」
劉德華昨日在灣仔親自指導吳卓羲做戲。DV圖片
劉德華（左）與吳卓羲合力將懷疑土製炸彈放入袋中。
笑吳卓羲靚仔
華仔被問拍檔Ron有沒有他的影子，華仔笑說：「佢靚仔，我都靚仔過。」今次是Ron離開無線後首部參與的電影，華仔形容是他人生美好的第一部電影，Ron說：「同華哥拍戲係嚟學嘢，華哥好有耐性教新人。但我好大壓力，佢蹺住手睇我演，酬勞就唔計。」在旁的華仔笑言：「你唔計我唔畀嘞，我都係畀錢先有得拍。」
早前Ron被指接新女返私竇，Ron避忌說：「唔講太多，係朋友嚟，再咁搞冇朋友做。」另外，張繼聰和BabyJohn在戲中分別飾演導遊及被綁炸彈的男子，張繼聰說：「今次最好玩係可以講普通話，估唔到我認真做戲時，啲人都係笑。」
採訪：張俊銘
攝影：沈健程
from:
http://hk.apple.nextmedia ... 160606/19642407
